കൊച്ചി: വിദ്യാഭ്യാസ പരിഷ്കർത്താവും ‘ഐടി ഫോർ ചേഞ്ച്’ സ്ഥാപകനുമായ ശ്രീ. ഗുരുമൂർത്തി കാശിനാഥൻ ഈ വർഷത്തെ ‘ബുക്കർമാൻ ടാഗോർ സ്മൃതി പുരസ്കാർ ’ ലഭിക്കുന്നതിനായി തിരഞ്ഞെടുക്കപ്പെട്ടു. 10,001 രൂപയും പ്രശസ്തിപത്രവും സുധി അന്ന (ചിത്രകാരനും ചലച്ചിത്രകാരനും) രൂപകൽപ്പന ചെയ്ത ശില്പവുമാണ് സമ്മാനിക്കുക. രബീന്ദ്രനാഥ ടാഗോറിന്റെ സാംസ്കാരിക-വിദ്യാഭ്യാസ ദർശനത്തെ ഉൾക്കൊണ്ട് സമൂഹത്തിൽ മാറ്റമുണ്ടാക്കുന്ന ശക്തിയായി പ്രവർത്തിക്കുന്നവർക്കാണ് ഈ പുരസ്കാരം നൽകിവരുന്നത്. പുരസ്കാര ചടങ്ങ് സെപ്റ്റംബറിൽ കൊച്ചിയിൽ നടക്കും.
നാലു വർഷമായി നൽകിവരുന്ന ഈ പുരസ്കാരം, ബൗദ്ധിക മിക
വിനെ സാമൂഹ്യ പ്രതിബദ്ധതയുമായി ബന്ധിപ്പിക്കുന്നവരെ ആദരിക്കുന്നു. വാണിജ്യ സമ്മർദ്ദങ്ങളെ ചെറുത്തുകൊണ്ട് സാങ്കേതികവിദ്യ വഴി വിദ്യാഭ്യാസത്തെ ജനാധിപത്യവൽക്കരിക്കുന്ന ഗുരുമൂർത്തിയുടെ പ്രവർത്തനം ശ്രദ്ധേയമാണ്. കർണാടക ഓപ്പൺ എഡ്യൂക്കേഷണൽ റിസോഴ്സസ് (KOER) വഴി കന്നഡ ഭാഷയിൽ അധ്യാപകർ നിർമ്മിച്ച ഡിജിറ്റൽ വിദ്യാഭ്യാസ സാമഗ്രികൾ വഴി പൊതുവിദ്യാഭ്യാസത്തിൽ അദ്ദേഹം വിപ്ലവം സൃഷ്ടിച്ചു. സബ്ജക്റ്റ് ടീച്ചർ ഫോറങ്ങൾ (STF) വഴി ഗ്രാമീണ അധ്യാപകരെ ശക്തിപ്പെടുത്തി. ആയിരക്കണക്കിന് സർക്കാർ സ്കൂൾ വിദ്യാർത്ഥികൾക്ക് ഇതിന്റെ പ്രയോജനം ലഭിക്കുന്നു. കോർപ്പറേറ്റ് എഡ്-ടെക് പരിഹാരങ്ങൾക്ക് പകരമായി പൊതു ഡിജിറ്റൽ ഇൻഫ്രാസ്ട്രക്ചറിനായി അദ്ദേഹം നടത്തിയ ശ്രമങ്ങളും പ്രശംസനീയമാണ്. ലിംഗ അസമത്വത്തെ ചെറുക്കാൻ ഫെമിനിസ്റ്റ് ഡിജിറ്റൽ സാക്ഷരത പ്രോഗ്രാമുകൾ വികസിപ്പിച്ചത് സ്ത്രീ വിദ്യാഭ്യാസ ശാക്തീകരണത്തിന്റെ വലിയ ചുവടുവെപ്പായിരുന്നു. 2006-ൽ സ്ഥാപിതമായ ഐടി ഫോർ ചേഞ്ച് വിദ്യാഭ്യാസം, ഭരണം, ലിംഗ സമത്വം എന്നിവയിൽ ഡിജിറ്റൽ നീതിക്കായി നൂതന മാതൃകകൾ വികസിപ്പിക്കുന്നു.
ഷൗക്കത്ത് (കേരളം), പ്രഹ്ലാദ് സിംഗ് ടിപാനിയ (മധ്യപ്രദേശ്), കുറിഞ്ചി വേലൻ (തമിഴ്‌നാട്) എന്നിവർക്കായിരുന്നു കഴിഞ്ഞ വർഷങ്ങളിലെ പുരസ്കാരങ്ങൾ.
